អចេតនា

 

អចេតនា

      តើអ្នកទាំងអស់គ្នាធ្លាប់ដែរទេ? ស្រលាញ់គេទាំងដែរគេមានម្ចាស់ទៅហើយ...

            យើងមិនចង់មានឈ្មោះទៅដណ្ដើមរបស់គេនោះទេ តែយើងបែរជាបណ្ដោយខ្លួនអោយធ្លាក់ចូលអន្លង់មួយនោះទៅវិញ។ ក្ដីសង្ឃឹមដែលមានចំពោះគេ ក្ដីសុខក្លែងក្លាយដែលបានកើតចេញពីគេ ធ្វើអោយយើងមិនអាចគេចផុតបាន បើទោះបីជាបដិសេធយ៉ាងណាក៏ដោយ។ ខ្ញុំធ្លាប់ហើយ ហើយក៏អស់ជំនឿទៀតដែរ។

            រឿងរ៉ាវស្នេហាខ្ញុំចំពោះមនុស្សស្រីដែលមានម្ចាស់ម្នាក់...//

            មួយរយៈពេលមុន ខ្ញុំបានស្គាល់នឹងនារីម្នាក់ ខ្ញុំចាប់អារម្មណ៍នឹងនាង ព្រោះថានាងតែងតែបង្ហាញអារម្មណ៍ឯកការរបស់នាងមករហូតតាមរយៈ Facebook ហើយខ្ញុំចាប់ផ្ដើមចង់ដឹងពីនាង។ ថ្ងៃដំបូងដែលខ្ញុំឆាតទៅនាង ខ្ញុំសួរនាំនាងពីមូលហេតុដែលនាងតែងតែពិបាកចិត្ដ ហើយនាងក៏ប្រាប់ថាគ្មានអីទេ គ្រាន់តែតាមអារម្មណ៍តិចតួច។ ថ្ងៃបន្ទាប់ យើងនិយាយគ្នាធម្មតា​ តែហាក់បីដូចស្គាល់គ្នាយូរណាស់ហើយយ៉ាងចឹង។ ខ្ញុំចាប់ផ្ដើមមានអារម្មណ៍ល្អៗពេលដែលបាននិយាយជាមួយនាង ហើយបន្ទាប់ពីនោះខ្ញុំតែងតែរងចាំនាងឆ្លើយតបនឹងខ្ញុំ បើទោះបីមួយមាត់ក៏ដោយចុះ។ គ្រប់យ៉ាងពិតជាសប្បាយរីករាយណាស់ យើងចាប់ផ្ដើមមានអារម្មណ៍ល្អៗ ហើយនាងក៏ចាប់ផ្ដើមលែងឯងការដូចមុន តែម្ដងម្កាលនាងបង្ហាញពីអារម្មណ៍សោកសៅម្ដង។

            កន្លងទៅជិតមួយខែខ្ញុំនិងនាងបានណាត់គ្នាទៅញ៉ាំអី ហើយនោះជាថ្ងៃដែលខ្ញុំរំភើបបំផុតពេលដែលបានជួបនាងនៅខាងក្រៅ នាងស្អាតខ្លាំងណាស់ ជាពិសេសនោះគឺស្នាមញញឹមរបស់នាង វាជាស្នាមញញឹមមួយដែលខ្ញុំមានអារម្មណ៍ថាកក់ក្ដៅបំផុតពេលដែលនាងញញឹមមកកាន់ខ្ញុំ។ នៅខាងក្រៅយើងមិនសូវនិយាយរកគ្នាទេ ដោយសារតែអៀនរាងខ្លួ​​ន។ បន្ទាប់ពីញ៉ាំអីរួចនាងក៏អោយខ្ញុំជូនត្រលប់ទៅផ្ទះ ខ្ញុំក៏ចាប់ផ្ដើមស្និតនឹងនាងខ្លាំងឡើងៗរហូតដល់ខ្ញុំមានអារម្មណ៍ប្លែកៗ ខ្ញុំនៅមិនសុខនោះទេបើសិនជាមិនបានជួបមុខនាង ដូច្នេះហើយរៀងរាល់ព្រឹកខ្ញុំតែងតែទិញអាហារយកទៅអោយនាងដល់ផ្ទះ ព្រោះឃើញមុននាងទើបខ្ញុំអាចដងដង្ហើមបាន។ ថ្វីបើគេយល់ថាខ្ញុំឆ្កួតតែអារម្មណ៍ចំពោះមនុស្សម្នាក់មិនមែនចេះតែមាននោះទេ ដូចពេលនេះចឹង ខ្ញុំក៏មិនយល់ពីខ្លួនឯងដូចគ្នា គ្រាន់តែខ្ញុំដឹងថា គ្រប់ពេលដែលខ្ញុំធ្វើដើម្បីនាងគឺខ្ញុំតែងតែសប្បាយចិត្ដ។

            មួយរយៈក្រោយមកនាងក៏ចាប់ផ្ដើមដូចដើមវិញ នាងតែងតែសោកសៅហើយខ្ញុំខំនិយាយយ៉ាងណាក៏មិនអាចជួយអ្វីនាងបាន ហើយខ្ញុំក៏នឹកឃើញកន្លែងមួយ។

“នាងទំនេរដែរទេ?” ខ្ញុំសួរនាង

“ចាស៎ទំនេរតើ”

“កុំពិបាកចិត្ដអី ខ្ញុំស្គាល់កន្លែងមួយដែលធ្វើអោយនាងមានអារម្មណ៍ល្អវិញ”

“កន្លែងអីទៅ?”

“ពិបាកចិត្ដចឹងទៅលេងកំពតជាមួយគ្នាទៅល្អទេ? ទៅនោះទេសភាពស្អាតៗ ហើយមានកន្លែងលេងច្រើនណាស់ ម្យ៉ាងទៀត ក្រែងនាងចូលចិត្ដសមុត្រមែនទេ? ចឹងយើងទៅទីនោះទៅ ខ្ញុំនឹងកក់សំបុត្រសម្រាប់នាង,​ ល្អទេ?” ខ្ញុំរៀបរាប់ ព្រមទាំងបង្ហាញរូបភាពទៅកាន់នាងជាមួយនឹងទីតាំងដែលត្រូវទៅ។

“ក៏ល្អដែរ ចឹងស្អែកនេះយើងទៅៗ” នាងយល់ព្រមឥតស្ទាក់ស្ទើរ។

            ថ្ងៃស្អែកយើងក៏រៀងចំខ្លួនដើម្បីដំណើរតំសាន្តមួយនេះ។ វាពិតជាធ្វើអោយខ្ញុំរំភើបខ្លាំងណាស់ ជាពេលវេលាមួយដែលខ្ញុំមិនអាចបំភ្លេចបាន ហើយខ្ញុំមិនដែលរំពឹងសោះឡើយថានឹងបានក្បែរនាងដូចពេលនេះ។ ការចងចាំមួយនេះវាដិតដាមខ្លាំងណាស់សម្រាប់ខ្ញុំ។ ពួកយើងធ្វើដំណើរទៅកំពតជាមួយគ្នា ដោយមានរថភ្លើងជាមធ្យោបាយ។ ប្រសិនបើអ្នកទាំងអស់គ្នាមានដំណើរកំសាន្ដទៅកំពតនោះ កុំភ្លេចសាកល្បងណា៎ យើងនឹងបានគយគន់ទេសភាពដ៏ស្រស់ស្អាតតាមផ្លូវធ្វើដំណើរលើរថភ្លើង។ ខ្ញុំសម្លឹងមើលទេសភាពជុំវិញ ប៉ុន្ដែនៅតែចាញ់សម្រស់នារីម្នាក់ដែលកំពុងតែអង្គុយក្បែរខ្ញុំ នាងហាក់ភ្លឹកនឹងទេសភាពជុំវិញនាង ហើយអារម្មណ៍សោកសៅរបស់នាងក៏គ្មានលើមុខដែរ គ្រប់យ៉ាងដូចជាផ្ការីកដ៏ស្រស់បំព្រោងមួយយ៉ាងចឹង។​ ខ្ញុំសម្លឹងនាងឥតព្រិច តែក៏ត្រូវងាកទៅវិញព្រោះខ្លាចនាងដឹងថា ខ្ញុំកំពុងតែមើលមុខនាង។ ខ្ញុំក៏ចាប់ភ្លឹកនឹងទេសភាពវិញម្ដង ប៉ុន្មានជា៣នាទី ដៃទន់ៗភ្ជាប់ជាមួយរបស់មួយដាក់ក្បែរត្រចៀករបស់ខ្ញុំ ខ្ញុំងាកទៅក៏ឃើញថានាងកំពុងតែដាក់កាសត្រចៀកស្ដាប់ជាមួយនឹងខ្ញុំ តើអ្នកទាំងអស់គ្នាដឹងទេ? អារម្មណ៍ពេលនោះខ្ញុំពិបាកនិយាយណាស់ ដឹងត្រឹមថារំភើប... បេះដូងរបស់ខ្ញុំផ្ដើមលោតញាប់ៗ មុខរបស់ខ្ញុំផ្ដើមមានកំដៅភាយៗ ឬមួយក៏ខ្ញុំអៀន? ប្រហែលជាបែបនោះហើយ។ ខ្ញុំបិទភ្នែកទទួលយកអារម្មណ៍មួយនោះអោយដិតនៅជាប់បេះដូង ចម្រៀងរបស់នាងចាក់រណ្ដំចិត្ដរបស់ខ្ញុំអោយលង់លក់តាមភ្លេង យើងប្ដូរមកនិយាយគ្នាពីនេះពីនោះនិងថតរូបលេងរហូតដល់កន្លែងដែលយើងត្រូវចុះ។
            យើងចុះមកដល់កំពត ហើយទៅរកកន្លែងសម្រាកដែលយើងបានកក់។ បន្ទាប់ពីនោះយើងក៏ទៅលេងនៅឯសមុទ្រ ទិដ្ឋភាពសមុទ្រទាំងមូលចាំងព្រិចៗចំភ្នែកខ្ញុំ វាធំធេងខ្លាំងណាស់ ប្រៀបដូចជាចិត្ដខ្ញុំមួយនេះដែលមានចំពោះមនុស្សម្នាក់ដែលឈរក្បែរខ្ញុំនេះយ៉ាងចឹង។ កំលាំងខ្យល់បក់ ផាត់សក់ក្រអូបសាយរបស់នាងចូលក្នុងច្រមុះខ្ញុំ វាក្រអូបដល់បេះដូងមួយនេះ នាងលាដៃទទួលយកអារម្មណ៍ស្រស់ថ្លាពីជំនោរខ្យល់បក់ ដែលធ្វើអោយនាងមើលទៅដូចជាទេពធីតាចុះមកពីឋានសួគ៍ នាងក៏ដើរទៅរកទោងលើទឹកហើយដាក់ខ្លួនតូចច្រលឹងរបស់នាងជិះលើវា ខ្ញុំក៏ដើរតាមនាងហើយទៅអង្គុយនៅទីនោះជាមួយនាង យើងនិយាយគ្នាដូចរាល់ដងដូចពេលដែលយើងលេងឆាតជាមួយគ្នា។

“សិទ្ធ! ខ្ញុំអរគុណដែលនាំខ្ញុំមកទីនេះ” នាងហៅឈ្មោះខ្ញុំហើយនិយាយអរគុណជាមួយនឹងសម្លេងដ៏ស្រទន់របស់នាង

“អរគុណខ្ញុំធ្វើអី? ជារឿងធម្មតាទេ” ខ្ញុំញញឹមដាក់នាង

            នាងសើចស្រស់ដាក់ខ្ញុំហើយអោនមុខចុះមើលទៅទឹកសមុទ្រដែលនៅរឹមៗនឹងជើងរបស់នាង ហើយសម្លេងទូរស័ព្ទក៏រោទ៍ឡើងធ្វើអោយនាងបញ្ឈប់សកម្មភាព​បន្ដិចហើយងើបទៅទទួលទូរស័ព្ទ។ ខ្ញុំមិនបានដឹងថានាងនិយាយជាមួយនាក់ណាឬនិយាយពីអ្វីនោះទេ គ្រាន់តែដឹងថាពេលនាងដាក់ទូរស័ព្ទចុះ ទឹកមុខរបស់នាងមិនសូវជាស្រស់បស់ប៉ុន្មានទេ។ ខ្ញុំក៏សួរនាង

“កើតអីហេ៎? ម៉ាក់ខលអោយត្រលប់ទៅផ្ទះវិញ?”

“ទេ អត់មានអីទេ” នាងគេចមុខចេញ

“ចុះធ្វើមុខពីបាកមើលម្ល៉េះ?”

“ឆ្កួត? មានមកពីណា, តោះប្ដូរបរិយាកាសទៅ” នាងអូសដៃខ្ញុំចេញមក ហើយយើងប្ដូរមកអង្គុយបែបផិចនិចវិញ នាងអោយខ្ញុំលេងយូកេឡេៗអោយនាងស្ដាប់ នាងផ្អែកស្មារបស់ខ្ញុំហើយច្រៀងតិចៗទៅតាមភ្លេងដែលខ្ញុំលេង ខ្ញុំមិនយល់សោះឡើយថាហេតុអ្វីនាងមានឥទ្ធិពលចំពោះបេះដូងខ្ញុំខ្លាំងម្ល៉េះ? ទាំងដែលខ្ញុំទើបតែស្គាល់នាងប៉ុណ្ណោះ ឬមួយខ្ញុំ.... ខ្ញុំប្រហែលជាស្រលាញ់នាងហើយ។ បន្ទាប់ពីយើងញ៉ាំអីបែបផិចនិចរួចយើងក៏ថតរូបលេងម្ដងទៀត ខ្ញុំស្មាក់ធ្វើជាកាមេរ៉ាមេន សម្រាប់នាងព្រោះខ្ញុំចូលចិត្ដស្នាមញញឹមដែលមានលើមុខនាង ជួលខ្ញុំថតមួយថ្ងៃពេញក៏ខ្ញុំមិនគិតលុយដែរ។ នាងនាំខ្ញុំរត់ប្រលែងលេងពេញវាលខ្សាច់ ទិដ្ឋភាពនោះពិតជាគួរអោយស្រលាញ់ណាស់ ខ្ញុំកាន់តែយល់ហើយថាខ្ញុំពិតជាធ្លាក់ក្នុងអន្លង់ស្នេហ៍មួយនេះពិតមែន។

            ចេញពីទៅនោះមកខ្ញុំក៏បបួលនាងជិះកង់ដោយមានខ្ញុំជាអ្នកឌុប យើងជិះគយគន់ទេសភាពតាមមេមដែលគេប្រាប់។ តាមផ្លូវធ្វើដំណើរមានតែនាងនិងខ្ញុំប៉ុណ្ណោះ ខ្ញុំជិះបណ្ដើរប្រាប់នាងពីនេះពីនោះបណ្ដើរ។ ខ្ញុំហាក់ដឹងពីកំដៅភាយៗពីក្រោយខ្នងខ្ញុំ ម្រាមដៃតូចៗសន្សឹមមករួមរឹតចង្កេះរបស់ខ្ញុំ រាងកាយទន់ភ្លន់របស់នាងប៉ះនឹងខ្នងក្រាស់របស់ខ្ញុំ។ មិនដឹងថាគួររៀបរាប់បែបណានោះទេ ដឹងត្រឹមពេលនេះខ្ញុំមានក្ដីសុខណាស់ ហើយខ្ញុំមិនចង់អោយវេលានេះរបូតផុតឡើយ បើអាចនោះខ្ញុំសុំពេលវេលាឈប់ត្រឹមនេះ។ ជិះមកដល់រាងឆ្ងាយបន្ដិតពួកយើងក៏ស្រេកទឹក ចៃដន្យអីមានតូបកាហ្វេមួយក្បែរនោះ ខ្ញុំក៏ឈប់កង់ហើយចុះទៅកម្ម៉ង់អីផឹក។ អ្នកលក់ឆុងកាហ្វេបណ្ដើរហើយមើលមុខពួកខ្ញុំបណ្ដើរ មួយសន្ទុះក្រោយមករបស់ដែលយើងកម្ម៉ង់ក៏រួចរាល់ អ្នកលក់ហុចវាមកអោយយើងព្រមជាមួយនឹងពាក្យប៉ុន្មានមាត់ថា

“បង! ពីរនាក់បងសមគ្នាដល់ហាយ”

            ខ្ញុំនិងនាងចាប់ផ្ដើមងាករកគ្នាពេលដែលលឺពាក្យនោះ ខ្ញុំក៏អត់នឹកស្មានដូចគ្នាថាគាត់និយាយពាក្យនេះមកកាន់ពួកយើង ហើយខ្ញុំចាប់ផ្ដើមមានអារម្មណ៍ល្អៗឡើងមកព្រមគ្នាទន្ទឹមនឹងពាក្យអម្បែងមិញនេះ។ នាងញញឹមដាក់ខ្ញុំដូចទម្លាប់ តែលើកនេះភ្ជាប់ជាមួយនឹងផ្ទៃមុខពណ៌ក្រហមតិចៗ វាកាន់តែលើកសម្រស់មកអោយនាងថែមទៀត វាបានបញ្ជាក់ថានាងក៏មានអារម្មណ៍ពិសេសជាមួយខ្ញុំដែរ។ នាងងាកមុខចេញ​បន្ដិចបន្ទាប់ពីការភ្លឹកនឹងគ្នាមួយសន្ទុះ ហើយពួកយើងក៏ទៅកន្លែងសម្រាកវិញ។​ តាមផ្លូវមកវិញអត់មានអ្នកណានិយាយអីទេ ព្រោះដឹងហើយថាក្នុងចិត្ដបែបណា បានត្រឹមតែញញឹមអឹមអៀនរៀងខ្លួនប៉ុណ្ណោះ។

            មកដល់កន្លែងរបស់យើងវិញខ្ញុំបានរៀបចំម្ហូបមួយចំនួនដែលខ្ញុំបានកម្ម៉ង់មក ព្រមជាមួយនឹងស្រាខ្លះៗ ទុកគ្រាន់ក្រេបមើលទេសភាពតិចៗ នាងឈរនៅជ្រុងម្ខាងនៃតុអាហារដែលខ្ញុំបានរៀបចំ ខ្ញុំក៏ចាក់ស្រាមួយកូនកែវអោយនាង និងសម្រាប់ខ្លួនឯងមួយទៀត យើងក្រេបវាតិចៗសម្លឹងមើលទៅឆ្ងាយជាមួយនឹងទឹកសមុទ្រដ៏ធំល្វឹងល្វើយដាច់កន្ទុយភ្នែក រៀងល្ងាចបន្តិចខ្ញុំប៊ិះនឹងភ្លេចថាខ្លួនឯងរៀបរបស់អ្វីម្យ៉ាងសម្រាប់នាង ហើយខ្ញុំប្រាប់នាងអោយរងចាំមួយភ្លែត នាងក៏យល់ព្រមហើយខ្ញុំក៏មិនបង្អង់យូរព្រោះថាវាដល់ពេលហើយ ខ្ញុំក៏ចូលទៅក្នុងដើម្បីទៅយកវាមក ហើយនាងចាំខ្ញុំនៅខាងក្រៅរៀបចំរបស់របរនៅលើតុខ្លះៗដើម្បីមើលទៅវាមានភាពទាក់ទាញ។ ខ្ញុំនាំរាងកាយខ្លួនឯងចូលទៅក្នុងបន្ទប់ដែលខ្ញុំបានរៀបចំរបស់ម្យ៉ាងសម្រាប់នាង ហើយខ្ញុំជឿជាក់ថានាងមិនបានដឹងខ្លួនមុននោះទេ ខ្ញុំគិតទុកជាស្រេចហើយថាខ្ញុំនឹងប្រាប់នាងអំពីវាដែលវាបានើលាក់ទុកក្នុងចិត្ដយូរគួរសមហើយ ខ្ញុំត្រៀមចិត្ដរួចរាល់ដើម្បីយកវាចេញ ភ្នែករបស់ខ្ញុំសម្លឹងទៅវាដោយភាពជឿជាក់ ខ្ញុំស្រូបខ្យល់ចូលសួតមួយដង្ហើមដើម្បីជាកម្លាំងចិត្ដ ហើយខ្ញុំកាន់វាទៅដោយក្ដីជឿជាក់ជាប៉ុនពេក។ ខ្ញុំចេញមកក្រៅជាមួយនឹងរបស់ពិសេសនៅក្នុងដៃ ប៉ុន្ដែ... នៅខាងក្រៅវិញបែរជាពិសេសជាងអ្វីដែលខ្ញុំគិតទៅទៀតរហូតដល់ខ្ញុំហាស្ដីលែងចេញ!! ខ្ញុំស្រឡាំងកាំងនឹងអ្វីដែលនៅចំពោះមុខខ្ញុំពេលនេះ វាហាក់បីដូចជាកាំបិតមុខស្រួចទម្លោះក្ដីសង្ឃឹមរបស់ខ្ញុំយ៉ាងចឹង!!!

________________________________ to be continues ___________________________